సంక్రాంతి - పందాలు - విశిష్టత

సంక్రాంతి వచ్చింది అనే సరికి కోడి పందాలు మీద, ఎడ్ల బండీల పోటీలు, జల్లి కట్టు మొ. ఆటలు మీద విమర్శలు గుప్పిస్తూ రక రకాల కధనాలు వస్తుంటాయి. 

కానీ కాస్త ఆలోచించి చూస్తే నిజంగా ఇవి వినోదం పంచడం కోసమేనా ఊద్దేశించబడ్డాయి లేక ఏదైనా కారణం ఉందా అని ఆలోచిస్తే నాకు ఈ క్రింది విధంగా అనిపించింది.

నేడు హింస అనుకుంటున్నవి ప్రాచీన కాలంలో వాటి శరీర దారుఢ్యం పెంచడానికి ప్రారంభింపబడి ఉండవచ్చు.

ఎద్దులు పోతులు ఎంత బలిష్టంగా ఉంటే రైతులకు, గ్రామీణులకు అంత ఉపయోగం.

ఎందుకు అంటే అవి గంటల తరబడి అలసిపోకుండా పొలాలు దున్నడానికి, నూర్పులకు, నూనె గానుగలు, నీటి ఏతాములు తిప్పడానికి, పంటలను ఇతర సరుకులను బళ్లపై రవాణా చేయడానికి, మనుషులు బళ్ల మీద ప్రయాణించడానికి...ఇలా ఒకటి ఏమిటి ప్రాచీన మనిషి జీవితం అంతా వీటితో పెనవేసుకుపోయి ఉంటుంది.

వీటిని మరి బలిష్టంగా తయారు చేయడం ఎలా?  ఒక్క బలవర్ధకమైన ఆహారం పెడితే చాలదు. వాటిలో ఇంకా కష్టపడే తత్త్వం, పోరాట  పటిమ, పౌరుషం వంటి లక్షణాలు పెరిగితే దానికి అనుగుణంగా వాటి శరీరంలో రసాయనాలు హర్మోన్లు ఉత్పత్తి చెంది వాటి బ్రీడ్ బలిష్టంగా తయారు అవుతుంది. అలాగే వీటి ద్వారా జన్మ ఇచ్చిన ఆవులు,గేదెలు మొ. వి కూడా బలిష్టంగా ఆరోగ్యంగా జన్మించి అవి ఇచ్చే పాలు కూడా బలంగా ఆరోగ్యం పెంపొందించే విధంగా ఉంటాయి.

అలాగే పుంజులు, గొర్రె పోతులు కూడా. అవి ఎంత దృఢంగా ఉంటే కోడి, గొర్రెల జాతులు అంత ఆరోగ్యంగా దృఢంగా ఉంటాయి. వాటి పాలు, గుడ్లు, మాంసం ఆహారంగా తీసుకునే వారికి కూడా ప్రకృతి సిద్ధమైన బలమైన ఆహారం లభిస్తుంది.

ఇటువంటివి  దృష్టిలో ఉంచుకొనే ఆ నాటి కాలంలో వీటిని ప్రవేశపెట్టి వుంటారు. మనుషులకు శరీర దారుఢ్యం పెరగడానికి, వారి జీన్స్ బలంగా ఆరోగ్యంగా తయారు అవడానికి మల్ల యుద్దాలు, కత్తులు తిప్పడాలు, సాము గరిడీలు, బరువులు ఎత్తడాలు ఎలాగో..ప్రవేశ పెట్టారో అలాగే వారి మధ్య పోటీలు ఎలా పెట్టారో ఈ జంతువులకు కూడా అదే దృష్టితో ఈ పోటీలు పెట్టి  ఉండ వచ్చు.

నేటి కాలంలో ఇటువంటి జంతువుల వంటి వాటికి బలం పెంచడానికి ఎన్నో దుష్ప్రభావాలు గల స్టెరాయిడ్స్, హార్మోన్ ఇంజెక్షన్స్  ఇస్తున్నారు.

అవి తాత్కాలికంగా పని చేస్తాయి. కానీ తరువాత దీర్ఘ కాలంలో ఆ జంతువులకు వాటి ఉత్పత్తులను ఆహారంగా స్వీకరించిన వారికి కూడా రోగాలు వచ్చే అవకాశం ఉంది.

ఎన్నో సం. ల నుండి పేరెన్నిక గన్న మన ఒంగోలు గిత్తలు బ్రీడ్ కి, అలాగే గిర్ వంటి దేశీయ గో బ్రీడ్ లకు నేటికీ  ప్రపంచంలో గొప్ప గుర్తింపు ఉంది.

అయితే కాలక్రమేణా ఈ పోటీలు కూడా మిగతా ఆటలు పోటీలు లాగే  మార్పు చెందుతూ వెర్రితలలు వేస్తున్నాయి.

అందుకని వీటిని పూర్తిగా బాన్ చెయ్యడం దీర్ఘ కాలంలో దేశ పశుసంపదాభివృద్దికి ప్రమాదం. అందుకని ఇటువంటి ఆటలను పూర్తిగా నిషేధించకుండా తగు జాగ్రత్తలు తీసుకొని ప్రభుత్వ పర్యవేక్షణలో జరపాలి.

....చాడా శాస్త్రి...